«Ал-Ҳилол» ҳужумчиси Малком «Ал-Дирия»га ўтишни якунлаш мақсадида Қирол кубоги доирасидаги «Ал-Раед»га қарши ўйинни ўтказиб юборган, аммо якунда ушбу трансфердан воз кечган. Бу ҳақда журналист Саша Тавольери X ижтимоий тармоғида маълум қилди.

Манбага кўра, аввалроқ Россиянинг «Зенит» клубида тўп тепган 29 ёшли бразилиялик футболчи фаолиятини Бирлашган Араб Амирликларида давом эттиришга қарор қилган.

Кутилишича, Малком «Ал-Ҳилол» билан шартномасини бекор қилади ва «Ал-Жазира» билан уч йиллик келишув имзолайди.

Transfermarkt портали футболчининг трансфер қийматини 18 миллион еврога баҳоламоқда.

Малком 2025/26 йилги мавсумда барча мусобақалар доирасида 40 та ўйинда майдонга тушиб, 9 та гол урди ва 12 та голли узатмани амалга оширди.