«Al-Hilol» hujumchisi Malkom «Al-Diriya»ga o‘tishni yakunlash maqsadida Qirol kubogi doirasidagi «Al-Rayed»ga qarshi o‘yinni o‘tkazib yuborgan, ammo yakunda ushbu transferdan voz kechgan. Bu haqda jurnalist Sasha Tavolyeri X ijtimoiy tarmog‘ida ma’lum qildi.
Manbaga ko‘ra, avvalroq Rossiyaning «Zenit» klubida to‘p tepgan 29 yoshli braziliyalik futbolchi faoliyatini Birlashgan Arab Amirliklarida davom ettirishga qaror qilgan.
Kutilishicha, Malkom «Al-Hilol» bilan shartnomasini bekor qiladi va «Al-Jazira» bilan uch yillik kelishuv imzolaydi.
Transfermarkt portali futbolchining transfer qiymatini 18 million yevroga baholamoqda.
Malkom 2025/26 yilgi mavsumda barcha musobaqalar doirasida 40 ta o‘yinda maydonga tushib, 9 ta gol urdi va 12 ta golli uzatmani amalga oshirdi.
