"Барселона" Мадриднинг "Атлетико" клуби ҳужумчиси Хулиан Альваресни ўз сафига қўшиб олиш ғоясидан воз кечгани йўқ.
Каталония гранди "матрасчилар"нинг музокаралар олиб боришни мутлақо хоҳламаётгани сабабли аргентиналик футболчининг трансферини шу ёзда амалга ошириши амримаҳол. Шунга қарамай, Barca Universal нашри журналист Самуэль Марсденга таяниб хабар беришича, "Барселона" Альваресни харид қилиш режаларидан воз кечмаяпти: янги уринишлар қишки трансфер ойнаси очиладиган январь ойидаёқ амалга оширилиши эҳтимолдан холи эмас.
Transfermarkt баҳосига кўра, Хулиан Альвареснинг бозор қиймати 120 миллион еврони ташкил этади. 26 ёшли ҳужумчининг "Атлетико" билан амалдаги шартномаси 2030 йилгача мўлжалланган.
