"Лион" клуби собиқ ҳимоячиси Робер Муйненинг вафот этганини маълум қилди. Франциялик собиқ футболчи 96 ёшда эди.

"Лион" баёнотида шундай дейилади:

"Робер Муйненинг вафоти ҳақидаги хабарни чуқур қайғу билан қабул қилдик. Франция терма жамоасининг 1958 йилги таркибидан ҳаёт бўлган сўнгги футболчи жамоамиз сафида 149 та учрашув ўтказган. Клуб унинг оиласи ва яқинларига самимий ҳамдардлик билдиради".

Муйне 1955 йилдан 1959 йилгача "Лион" шарафини ҳимоя қилган. Шунингдек, у 1949–1953 ва 1959–1963 йилларда "Тулуза", 1953–1955 йилларда эса "Канн" сафида тўп тепган.

"Тулуза" ҳам собиқ футболчисининг вафоти муносабати билан ҳамдардлик билдирди. Муйне ушбу клуб сафида саккиз мавсум давомида 184 та ўйин ўтказган. У 1953 йилда "Тулуза"нинг иккинчи дивизиондаги илк чемпионлигига ҳисса қўшган футболчилардан бири эди.

Робер Муйне Франция терма жамоаси таркибида 1958 йилги жаҳон чемпионатида иштирок этган. Ўша мусобақада французлар бронза медалларини қўлга киритган.