«Порту» «Милан» ҳужумчиси Сантьяго Хименеснинг трансфери бўйича музокараларни вақтинча тўхтатди. Goal нашрининг O Jogo’га таяниб хабар беришича, томонлар трансфер суммаси ва формати бўйича бир қарорга кела олишмаган.

Ўтган мавсумда 25 ёшли мексикалик жароҳат сабабли ўйинларнинг бир қисмини ўтказиб юборди ва 18 та ўйинда майдонга тушиб, 1 та гол урди ҳамда 3 та голли узатмага муаллифлик қилди.

Португалия клуби ҳужумчини бепул ижарага олишни ва муайян шартлар бажарилганда 15 миллион еврога мажбурий сотиб олиш опциясини таклиф қилган эди.

«Милан» ушбу таклифни рад этди. Италия клуби пуллик ижара ва кейинчалик 20–25 миллион еврога сотиб олиш ҳуқуқини сақлаб қолишни хоҳламоқда. Ушбу вариант «россонери»га Хименесни «Фейеноорд»дан тахминан 32 миллион еврога сотиб олгандан сўнг кўрилган молиявий йўқотишларни камайтириш имконини беради.

«Милан»нинг рад жавобидан сўнг «Порту» муқобил ҳужумчиларни излашга киришди.