19-август, чоршанба куни Саудия Арабистони Спорт вазирлиги «Ан-Наср», «Ал-Иттиҳод», «Ал-Аҳли» ва «Ал-Ҳилол» клубларининг нотижорат ташкилотларига тегишли 25 фоизлик акцияларини Давлат инвестиция жамғармаси (PIF) тасарруфига ўтказиш жараёни бошланганини эълон қилди. Бу ҳақда Saudi Gazette хабар берди.
Мазкур қарор натижасида ушбу тўрт клубнинг директорлар кенгашлари тарқатилиши кўзда тутилган.
Бу жараён тўртта клубнинг мулк ҳуқуқини ўтказиш бўйича иккинчи босқич ҳисобланади ва уларни хусусий мулкчилик моделига тўлиқ ўтказишга қаратилган лойиҳанинг бир қисми саналади.
Натижада «Ал-Ҳилол», «Ан-Наср» ва «Ал-Аҳли» тўлиқ PIF тасарруфига ўтиши кутилмоқда.
«Ал-Ҳилол», «Ан-Наср» ва «Ал-Аҳли» клублари ўтиш жараёнини барқарор тарзда якунлаш мақсадида амалдаги директорлар кенгашлари яна 90 кун давомида ўз фаолиятини давом эттиришини маълум қилди.
«Ал-Иттиҳод» эса клуб президенти Фаҳд Синдининг ўз лавозимидаги фаолияти дарҳол якунланганини эълон қилди.
