Бугун, 21 август куни Англия Премьер-лигасининг 2026/27 йилги мавсумига старт берилади. Чемпионатнинг очилиш учрашувида амалдаги чемпион «Арсенал» элитага 25 йиллик танаффусдан сўнг қайтган «Ковентри Сити»ни қабул қилади. Баҳс Лондондаги «Эмирейтс» стадионида ўтказилади.
Чемпион учун янги вазифа
Микель Артета жамоаси янги мавсумни энди таъқибчи эмас, чемпион сифатида бошлайди. «Арсенал» ўтган мавсумда 85 очко тўплаб, иккинчи ўриндаги «Манчестер Сити»ни 7 очкога ортда қолдирган ҳолда Премьер-лига ғолиби бўлди.
Лондонликлар ёзда ҳам таркибни кучайтиришда давом этди. Энг катта трансферлардан бири «Ньюкасл»дан 75 млн фунтга Бруну Гимараэснинг харид қилиниши бўлди. Шунингдек, Кристос Цолис, Пьеро Инкапье ва Иллан Мелье ҳам жамоага қўшилди.
«Арсенал» мавсумнинг илк расмий совринини ҳам қўлга киритишга улгурди — Артета шогирдлари Англия Суперкубоги баҳсида «Манчестер Сити»дан устун келди. Бироқ ўша учрашувда жароҳат олган Гимараэснинг «Ковентри»га қарши майдонга тушиши сўроқ остида.
Сака ва Райснинг ҳолати
Артета учун асосий масалалардан бири етакчи футболчиларнинг жисмоний ҳолати бўлади. Букайо Сака ва Деклан Райс Суперкубок баҳсида захирадан майдонга тушган эди. Сака бошланғич таркибга қайтиши кутилмоқда, Райсга эса тўлиқ тайёргарликка қайтиш учун қўшимча вақт берилиши мумкин.
Ҳимоя чизиғида эса муаммолар бор. Вильям Салиба Жаҳон чемпионатида олган бел жароҳати сабаб сафдан чиққан, Юрриен Тимбер ҳам тикланиш жараёнини давом эттирмоқда.
«Ковентри» 25 йилдан сўнг АПЛда
Фрэнк Лэмпард бошчилигидаги «Ковентри» учун эса бу учрашувнинг аҳамияти бутунлай бошқача. Жамоа 2001 йилдан бери илк марта Англиянинг юқори дивизионида майдонга тушади. «Ковентри» Чемпионшипни ютиб, Премьер-лигага тўғридан-тўғри йўлланма олди.
Қуръа янги жамоага дарҳол энг қийин синовлардан бирини тақдим қилди — сафарда амалдаги чемпионга қарши баҳс.
Шунга қарамай, Лэмпард жамоаси мавсумолди тайёргарлигини яхши ўтказди. Жумладан, сўнгги назорат учрашувида «Монако» 2:0 ҳисобида мағлуб этилди.
Статистика «Арсенал» томонида
Жамоалар турли мусобақалар доирасида 76 марта тўқнаш келган. «Арсенал» 43 та учрашувда ғалаба қозонган, «Ковентри» 14 марта устун келган, яна 19 баҳс дуранг билан якунланган.
Лондонликларнинг янги чиққан жамоаларга қарши уйдаги статистикаси янада таъсирли: «Арсенал» Премьер-лигага кўтарилган клубларга қарши охирги 45 та уй учрашувида мағлуб бўлмаган — 40 ғалаба ва 5 дуранг. «Ковентри» эса амалдаги Англия чемпиони майдонидаги охирги 7 та лига ўйинининг барчасида мағлубиятга учраган.
Икки клубнинг сўнгги учрашуви 2014 йил январда Англия кубогида бўлиб ўтган ва «Арсенал» 4:0 ҳисобида ғалаба қозонган.
Артета — Лэмпард
Баҳснинг яна бир қизиқ жиҳати мураббийлар қарама-қаршилиги бўлади. Бир томонда «Арсенал»ни чемпионликка олиб чиққан Микель Артета, иккинчи томонда эса «Ковентри»ни Премьер-лигага қайтарган Фрэнк Лэмпард.
Кучлар нисбати ва уй майдони омили бўйича «Арсенал» учрашувнинг яққол фаворити. Аммо мавсумнинг илк ўйинлари кўпинча кутилмаган натижаларга бой бўлади. «Ковентри» учун эса босим деярли йўқ — жамоа 25 йиллик танаффусдан кейинги илк АПЛ баҳсида амалдаги чемпионга қарши ўз имкониятини синаб кўради.
Учрашув: «Арсенал» — «Ковентри Сити»
Мусобақа: Англия Премьер-лигаси, 1-тур
Сана: 21 август, 2026 йил, 23:59 (ТШВ)
Стадион: «Эмирейтс», Лондон
Бош ҳакам: Том Брамалл
