"Челси" бош мураббийи Хаби Алонсо футболнинг гўзаллиги нимада экани ҳақида ўз фикрларини билдирди. Испаниялик мутахассис янги мавсум олдидан Лондон клубида ўз ғояларини татбиқ этишга киришган.
"Мен учун футболнинг гўзаллиги — футболчиларнинг майдондаги эркинлигида. Машғулотларда жуда кўп нарсалар устида ишлаш мумкин, аммо шундай вазиятлар борки, уларни олдиндан машқ қилиб бўлмайди. Бундай лаҳзалар футболчиларнинг иқтидори туфайли ўз-ўзидан юзага келади.
Биз, мураббийлар, кўпинча ҳамма нарсани тўлиқ назорат қилишга ҳаракат қиламиз. Аммо баъзида ўйин давомида шундай лаҳза келадики, сиз энди ҳеч нарсани назорат қила олмайсиз. Шунда фақат: "Хўш, кўрамиз, нима бўлар экан", деб ўйлайсиз", — деди Алонсо.
Хаби Алонсо ёзда "Челси" бош мураббийига айланди. У ўтган мавсумни Мадриднинг "Реал" клуби бош мураббийи сифатида бошлаган, аммо 2026 йил январда Испания клубини тарк этган эди.
