Гана миллий жамоаси ярим ҳимоячиси Томас Парти фаолиятини Саудия Арабистони чемпионатида давом эттиради. «Аш-Шабаб» 21 август куни футболчи билан шартнома имзоланганини расман эълон қилди.
33 ёшли футболчи янги клубига эркин агент мақомида қўшилди. Манбаларга кўра, томонлар бир йиллик шартнома имзолаган. Партининг йиллик маоши тахминан 4,5 млн доллар бўлиши хабар қилинмоқда.
Ганалик футболчи бир кун аввал Ар-Риёдга етиб келган ва трансферни якунлашдан олдин тиббий кўрикдан ўтган. Барча расмий жараёнлар муваффақиятли тугагач, «Ал-Шабаб» трансферни эълон қилди.
Парти ўтган мавсумни Испаниянинг «Вильярреал» клубида ўтказган эди. У 2025 йил ёзида «Арсенал» билан шартномаси якунлангач, Ла Лига вакилига эркин агент сифатида қўшилган. «Вильярреал» билан бир йиллик келишув муддати тугагач, футболчи яна эркин агентга айланди.
Томас Парти фаолияти давомида «Атлетико», «Мальорка», «Альмерия», «Арсенал» ва «Вильярреал» каби клубларда тўп сурган. Эндиликда тажрибали таянч ярим ҳимоячиси фаолиятида илк бор Саудия Арабистони чемпионатида ўйнайди.
