"Фулхэм" бош мураббийи Альваро Арбелоа душанба куни Хаби Алонсо бошқараётган жамоага қарши ўйинда дўстлик муносабатлари бир четда қолишини ҳазил билан таъкидлади.

Арбелоа яқинда Испания терма жамоасидаги собиқ шериги билан суҳбатлашганини, аммо улар футбол ҳақида гаплашмаганини маълум қилди. Икки мутахассис ҳамон яқин дўст бўлиб, уларнинг оилалари ҳам Лондонга келишни режалаштирган.

"Бир неча кун олдин Хаби билан гаплашдим. Аммо футбол ҳақида эмас. Иккаламизнинг ҳам оиламиз Лондонга келяпти ва биз жуда яхши дўстмиз... Душанба оқшомигача", — деди Арбелоа.

"Фулхэм" устози Алонсо бошқарадиган жамоаларнинг ўйин услубини яхши билишини ва қийин баҳс кутаётганини ҳам таъкидлади.

"Биз 90 дақиқа давомида майдон четида бир-биримизга жуда яқин турамиз ва клубларимиз учун боримизни берамиз. Ўша 90 дақиқа мобайнида биз дўст эмасмиз", — дея қўшимча қилди Арбелоа.

Арбелоа ва Алонсо футболчилик фаолияти давомида Испания терма жамоасида бирга тўп тепган.