"Фулхэм" "Аталанта"нинг ўнг қанот ҳимоячиси Рауль Беллановани қўлга киритиш ҳаракатларини давом эттирмоқда.
Инсайдер Николо Скира маълумотига кўра, Лондон клуби 26 ёшли италиялик футболчи учун янги таклиф юборишга тайёр. "Фулхэм"нинг аввалги, тахминан 20 млн евролик таклифи бергамоликлар томонидан рад этилганди.
"Аталанта" ҳозирча Беллановани сотишни режалаштирмаяпти ва уни асосий таркиб футболчиларидан бири сифатида кўрмоқда. Шунга қарамай, "Фулхэм" музокараларни давом эттириш ниятида. Италиядаги сўнгги хабарларга кўра, англияликлар янги таклиф миқдорини 27 млн еврогача ошириши мумкин.
Белланованинг ўзи эса Лондон клубига ўтиш вариантига ижобий муносабат билдирган. Энди асосий масала икки клубнинг трансфер нархи бўйича келишувга эришишида қолмоқда.
Белланова "Аталанта"га 2024 йил ёзида "Торино"дан келиб қўшилган. У ўнг қанот ҳимоячиси ва вингбек позицияларида ҳаракат қилади. Футболчининг амалдаги шартномаси 2029 йилгача мўлжалланган.
