Ўтмишда Италиянинг турли клублари сафида ҳаракат қилган аргентиналик тажрибали ҳужумчи Мауро Сарате ватанига қайтиб, «Велес» билан шартнома имзолади. Айни пайтда футболчи 39 ёшда.

ESPN маълумотига кўра, Сарате ўзига жуда яхши таниш бўлган клубга қайтди. У аввал «Велес» сафида икки хил даврда жами олти йил тўп тепган.

«Мухлислар гуруҳидаги жуда яхши танийдиган йигитларимдан бири мен билан саломлашди. У мени уйга қайтганим билан табриклади. Бу сўзлар менга жуда қаттиқ таъсир қилди», — деди Сарате ватанига қайтгач, аэропортдаги дастлабки дақиқалари ҳақида.

Эслатиб ўтамиз, Саратенинг «Велес»гача бўлган сўнгги клуби Италиянинг «Козенца» жамоаси эди. У мазкур клуб сафида 2023 йилда ўйнаган.