«Интер Майами» ҳужумчиси Лионель Месси профессионал фаолиятидаги 923-голини урди.

39 ёшли аргентиналик юлдуз МЛС доирасида «Торонто»га қарши кечган учрашувда гол муаллифи бўлди. Месси 82-дақиқада Родриго Де Паулнинг узатмасидан сўнг рақиб дарвозасини ишғол қилди, аммо унинг голи жамоасини мағлубиятдан қутқариб қола олмади — «Интер Майами» 1:2 ҳисобида имкониятни бой берди.

Манбада келтирилган статистикага кўра, Месси фаолияти давомида 1170 та учрашув ўтказиб, 923 та гол урган ва 420 та голли узатмани амалга оширган.

Унинг азалий рақобатчиси, «Ан-Наср» ҳужумчиси Криштиану Роналду ҳисобида эса 1331 та учрашувда 977 та гол ва 261 та голли узатма бор.

Шу тариқа, икки футболчи ўртасида урилган голлар бўйича фарқ 54 тани ташкил этмоқда.