«Ливерпуль» Сенегал терма жамоаси ва «Кристал Пэлас» вингери Исмоила Саррга қизиқиш билдирмоқда. Мерсисайдликлар 28 ёшли футболчи учун «Галатасарой» билан рақобатлашиши мумкин. Туркия клуби бош мураббийи Саррни ўз жамоасида кўришни жуда истамоқда. Бу ҳақда журналист Невзат Диндар X ижтимоий тармоғидаги саҳифасида хабар берди.

Манба маълумотига кўра, «Кристал Пэлас» футболчини сотишни истамаяпти, аммо Саррнинг ўзи «бургутлар» сафини тарк этиш ниятида.

Сарр ЖЧ-2026да Сенегал терма жамоасининг энг яхши тўпурари бўлди. Ҳужумчи мусобақада 4 та учрашув ўтказиб, 4 та гол урди.

Ўтган мавсумда Сарр «Кристал Пэлас» сафида барча мусобақаларда 45 та ўйинда иштирок этиб, 21 та гол урди ва 2 та голли узатмани амалга оширди.

Футболчининг «Кристал Пэлас» билан амалдаги шартномаси 2029 йил ёзига қадар мўлжалланган. Transfermarkt портали маълумотига кўра, Саррнинг бозор қиймати 45 миллион еврони ташкил этади.