Англия Премьер-лигасининг 2026/27 йилги мавсуми 1-туридан ўрин олган "Ньюкасл Юнайтед" — "Ливерпуль" учрашуви якунланди. "Сент-Жеймс Парк" стадионида ўтган баҳс 2:2 ҳисобидаги дуранг билан тугади.

Учрашувнинг 5-дақиқасида Энтони Эланга ҳисобни очиб, "Ньюкасл"ни олдинга олиб чиқди.

55-дақиқада Коди Гакпо жавоб голини киритиб, "Ливерпуль" учун ҳисобни тенглаштирди — 1:1. Орадан уч дақиқа ўтиб, Жо Уиллок "Ньюкасл"нинг иккинчи голини урди — 2:1.

"Ливерпуль" мағлубиятдан учрашувга қўшиб берилган вақтда қутулиб қолди. 90+9-дақиқада Доминик Собослаи пенальтини аниқ амалга ошириб, якуний ҳисобни ўрнатди — 2:2.

Ўтган мавсумда "Ньюкасл Юнайтед" 49 очко билан АПЛ турнир жадвалида 12-ўринни эгаллаган. "Ливерпуль" эса 60 очко тўплаб, мавсумни 5-поғонада якунлаган.

Кейинги турда "Ньюкасл" 29 август куни сафарда "Тоттенхэм"га қарши ўйнайди. "Ливерпуль" эса шу куни ўз майдонида "Ноттингем Форест"ни қабул қилади.