Эрон Про-лигасида “Истиқлол”нинг ғалабали юриши давом этмоқда. Теҳрон клуби 3-турда ўз майдонида “Сепахон”ни қабул қилиб, 2:0 ҳисобида устун келди.

Мезбонлар учрашув тақдирини дастлабки 11 дақиқадаёқ ҳал қилиб қўйди. 4-дақиқада Ясир Асани ҳисобни очган бўлса, 11-дақиқада Исмаили Гализада “Истиқлол”нинг иккинчи голини урди. Қолган вақт давомида ҳисоб ўзгармади.

Ўзбекистон миллий жамоаси ҳимоячиси Рустам Ашурматов “Истиқлол”нинг бошланғич таркибидан жой олди ва учрашувни тўлиқ ўтказди. Жалолиддин Машарипов эса бу сафар захирада қолди ва майдонга туширилмади.

Ушбу ғалаба орқали “Истиқлол” мавсум стартидаги мукаммал натижасини сақлаб қолди. Теҳронликлар дастлабки учта учрашувнинг барчасида ғалаба қозониб, 9 очко билан Про-лига турнир жадвалида пешқадамлик қилмоқда.