"Атлетико" бош мураббийи Диего Симеоне "Вильярреал"га қарши Ла Лига 2-туридан кейин ҳужумчи Хулиан Альварес атрофидаги вазиятга муносабат билдирди.
Аргентиналик футболчи 66-дақиқада захирадан майдонга тушди. "Метрополитано"даги мухлислар уни исми эълон қилинганида, қизиш машқлари пайтида ва майдонга тушганида ҳуштакбозлик билан қарши олди. Учрашув 2:2 ҳисобида якунланди.
Ўйиндан кейин Альварес жамоадошлари билан бирга трибунадаги мухлисларга миннатдорлик билдириш учун қолмади ва кийиниш хонасига йўл олди. Симеоненинг айтишича, бу футболчининг шахсий қарори эмас, балки клуб томонидан қабул қилинган чора бўлган.
"Клубдагилар менга Хулианни трибуналарга яқинлаштирмасликка қарор қилинганини айтишди. Уни мухлислардан узоқлаштириб, кийиниш хонасига юбориш клубнинг қарори эди.
Агар соврин ютишни истасак, бирдам бўлишимиз керак. Бизга ҳужумчилар, муҳим ҳужумчилар керак ва уларни асрашимиз лозим", — деди Симеоне.
Альваресга нисбатан мухлисларнинг норозилиги унинг ёзда "Атлетико"ни тарк этиш истагини билдиргани билан боғлиқ. Хусусан, аргентиналик форварднинг "Барселона"га ўтиш истаги ҳақида хабарлар тарқалган эди.
Шу тариқа, "Атлетико" мавсумдаги дастлабки икки турдан кейин илк очкосини қўлга киритди. "Вильярреал"га қарши баҳсда мадридликлар Робин Ле Норманнинг четлатилишидан кейин ўн киши бўлиб қолганига қарамай, Жулиано Симеоненинг кечки голи эвазига мағлубиятдан қутулиб қолди.
