«ПСЖ»нинг янги футболчиси Мика Годтс Франция чемпионати 1-турида «Ренн»га қарши ўтказилган учрашувдан (2:2) сўнг ўз фикрларини билдирди.

21 ёшли бельгиялик футболчи ёзги трансфер ойнасида «Аякс»дан Париж клубига келиб қўшилганди. У «Ренн»га қарши баҳсда танаффусдан кейин майдонга тушди. Ўша пайтда «ПСЖ» 0:2 ҳисобида ортда бораётган эди.

«Биз 0:2 ҳисобида ютқазаётгандик. Иккинчи бўлимга ҳисобни тенглаштиришга қатъий бел боғлаб чиқдик ва бунинг уддасидан чиқдик. Дебют қилганимдан хурсанд эдим, аммо жамоа ҳисобда ортда бораётгани учун бор эътиборимни ўз ўйинимга қаратишга ҳаракат қилдим.

Мухлислар жуда муҳим. Улар бизга катта ёрдам беради. Биринчи жавоб голини урганимиздан кейин буни ҳис қилдик. Улар бизни яна гол уришга ундади ва биз бунга эришдик», — деди Годтс.

«ПСЖ»га дурангни ёзда жамоага келиб қўшилган Ферран Торреснинг дубли олиб келди. Испаниялик футболчи 71 ва 82-дақиқаларда рақиб дарвозасини ишғол қилди.

Годтс ўтган мавсумда «Аякс» сафида барча мусобақаларда 44 та ўйин ўтказиб, 17 та гол ва 15 та голли узатма қайд этган. Янги клубида эса ҳозирча бир бўлим ҳаракат қилди.