«Барселона» «Эльче»га қарши сафар учрашуви олдидан «Мартинес Валеро» стадиони атрофида мухлисларга нисбатан полиция томонидан куч ишлатилганини қоралаб, расмий баёнот берди.
Маълум қилинишича, ўйин олдидан полиция ходимлари «Барселона»нинг айрим мухлисларини қўлга олган ва улардан Каталония мустақиллигини қўллаб-қувватлаш рамзи ҳисобланган «эстелада» байроқларини мусодара қилган. Қўлга олиш жараёнида мухлислардан бирига нисбатан куч ишлатилгани хабар қилинди.
«"Барселона" клуб аъзолари ва мухлисларига нисбатан номутаносиб куч ишлатилганини қоралайди. Хусусан, мухлисларимиздан бирини қўлга олиш жараёнида қўлланган чоралар номутаносиб, куч ишлатилиши эса асоссиз ва ноўрин бўлган, деб ҳисоблаймиз», — дейилади клуб баёнотида.
Каталонияликлар қўлга олинган мухлис ва унинг оиласига зарур ёрдам кўрсатишга тайёрлигини билдирган.
Шунингдек, клуб полиция томонидан «эстелада» байроқларининг мусодара қилинганидан норозилик билдириб, ушбу рамзни намойиш этиш фикр билдириш эркинлигининг қонуний кўриниши эканини таъкидлади.
«Барселона» воқеа юзасидан тегишли тушунтиришларни кутаётганини ва ўз аъзолари ҳамда мухлисларининг ҳуқуқларини ҳимоя қилиш учун зарур чораларни кўриш ҳуқуқини сақлаб қолишини маълум қилди.
