«Реал Мадрид» ҳимоячиси Рауль Асенсио ўтган мавсумдан бери уни безовта қилиб келаётган оёқ мушаги жароҳатининг қайталангани туфайли жарроҳлик амалиётини бошидан ўтказиши мумкин. Футболчи жарроҳлик столига ётишдан қочиш мақсадида «Вальдебебас» базасида махсус даволаниш курсидан ўтди.
Мазкур муаммо ўтган мавсумнинг сўнгги қисмидаёқ юзага келган эди. Ўшанда жамоада кадрлар муаммоси кузатилгани сабабли Асенсио жароҳатига қарамасдан майдонга тушишда давом этган. У кичик инвазив муолажадан сўнг қайтган бўлса-да, тиббий муаммо яна ўз кучи билан намоён бўлмоқда.
Агар ҳозирги кўрилаётган чоралар наф бермаса, ҳимоячи албатта операция қилинади ва бу ҳолат уни 6-8 ҳафтага майдондан узоқлаштиради. Бундан аввалроқ футболчи сон мушаклари жароҳатидан ҳам тикланган эди. Шу тариқа, «Қироллик клуби» яқин орадаги ўйинларда ўз ҳимоячисининг хизматидан фойдалана олмайди.
