«Бобур Арена»да яна катта футбол байрами. Суперлиганинг 19-турида «Андижон» жамоаси «Хоразм»ни қабул қилади.
Ушбу клубларнинг Ўзбекистон чемпионатидаги илк учрашуви 1996 йилда бўлиб ўтган. Ўшанда «Хоразм» «Динамо Урганч», «Андижон» эса «Наврўз» номи билан иштирок этган. Илк баҳс 1:1 ҳисобида якунланган.
Жамоалар шу пайтга қадар чемпионат доирасида 19 марта ўзаро тўқнаш келишган. «Андижон» 11 та, «Хоразм» 4 та ғалабага эришган. Яна 4 та учрашувда дуранг қайд этилган. Тўплар нисбати — 40:19, «Андижон» фойдасига.
Жорий мавсумнинг биринчи даврасида Урганчда ўтказилган учрашувда «Андижон» 3:0 ҳисобида ишончли ғалабага эришган. Ўша баҳсда Андроникашвили, Иминов ва Черан гол урган.
«Андижон» ўз майдонида «Хоразм»ни сўнгги бор 2025 йилда мағлуб этган — 3:2. Қизиғи, ўша йили андижонликлар сафарда ҳам рақибини худди шу — 3:2 ҳисобида таслим қилган.
Жамоаларнинг сўнгги 5 та ўзаро учрашуви:
04.05.2026. «Хоразм» — «Андижон» — 0:3
21.11.2025. «Андижон» — «Хоразм» — 3:2
26.06.2025. «Хоразм» — «Андижон» — 2:3
16.11.2022. «Андижон» — «Хоразм» — 3:1
16.10.2022. «Хоразм» — «Андижон» — 0:1
Жамоалар ўртасидаги энг йирик ҳисоб 2006 йил 19 август куни қайд этилган. Ўшанда «Андижон» «Хоразм»ни 7:1 ҳисобида тор-мор келтирган.
Айни пайтда Суперлига турнир жадвалида «Андижон» 24 очко билан 9-ўринда, «Хоразм» эса 20 очко билан 11-поғонада бормоқда.
