Телебошловчи ва «Арсенал» мухлиси Пирс Морган «Атлетико» ишқибозларининг Хулиан Альваресга нисбатан салбий муносабатига ўз фикрини билдирди.

Мадрид клуби ҳужумчиси Ла Лиганинг 2-туридан ўрин олган «Вильярреал»га қарши учрашувда (2:2) 66-дақиқада захирадан майдонга тушди. Аргентиналик футболчи ўйинга қўшилганидан кейин «Атлетико» мухлислари унинг деярли ҳар бир тўпга тегишида ҳуштакбозлик қилишди. Трибуналардаги айрим мухлислар эса: «Унга айтинглар, бир умрга кетсин!» дея ҳайқиришди.

Бундан ташқари, Альварес ўйин бошланишидан аввал, танаффусдаги қизиш машқлари пайтида ва финал ҳуштагидан кейин ҳам мухлисларнинг норозилигига учради. Учрашувдан сўнг клуб қарори билан у трибуналарга яқинлашмай, тўғри кийиниш хонасига йўл олди.

Аввалроқ Хулиан жамоасини ўзгартириш истагини билдирганди. Аргентиналик ҳужумчига «Барселона» ва «Арсенал» томонидан қизиқиш мавжуд. Айни пайтда «Арсенал» уни харид қилиш имкониятини жиддий кўриб чиқаётгани ҳақида ҳам хабарлар тарқалмоқда.

«Жирканч ҳолат. “Арсенал”га кел, Хулиан. Биз сенга худодек муносабатда бўламиз», — деб ёзди Морган.