Англиянинг «Эвертон» клубига тегишли бўлган 28 ёшли африкалик ҳужумчи Бету ёзги трансфер ойнаси ёпилгунига қадар жамоасини ўзгартириши мумкин. Бу ҳақда инсайдер Николо Скира ижтимоий тармоқларда хабар берди.
Журналистнинг маълум қилишича, тажрибали форвард фаолиятини Италия А Сериясида давом эттириш имкониятига эга. Бетуни «Фиорентина» ўз сафига қўшиб олишни режалаштирмоқда.
Аввалроқ футболчининг хизматлари Туриннинг «Ювентус» клубига ҳам таклиф қилингани ҳақида хабарлар тарқалган эди.
Бету ўтган мавсумда барча мусобақалар доирасида 40 та учрашувда майдонга тушди. Ҳужумчи ушбу баҳсларда 10 та гол урди ва битта голли узатмани амалга оширди.
