«Ювентус» икки янги футболчини таркибга қўшиб олиш учун ҳужумчи Жонатан Дэвид билан хайрлашишга тайёр.

«Кекса синьора» эркин агент мақомидаги Франк Кессье билан шартнома имзолаш устида ишлашда давом этмоқда. Инсайдер Жанлука Ди Марцио маълумотига кўра, Турин клуби ивуарлик ярим ҳимоячининг маошини қоплаш имконига эга бўлиш учун таркибдаги футболчилардан бири билан хайрлашиши керак.

Бу футболчи Жонатан Дэвид бўлиши мумкин. «Ювентус» аллақачон канадалик форвардни сотиш устида иш олиб бормоқда. Дэвиднинг кетиши клубнинг маошлар фондида тахминан 7 миллион евро маблағни бўшатиб беради.

Бу эса «Ювентус»га нафақат Кессьени, балки «Манчестер Юнайтед» ҳужумчиси Жошуа Зиркзеени ҳам ўз сафига қўшиб олиш имконини бериши мумкин.

Жонатан Дэвид ўтган йилнинг ёзида эркин агент сифатида «бьянконерилар» сафига қўшилган эди. Transfermarkt портали 26 ёшли футболчининг бозор қийматини 30 миллион еврога баҳоламоқда.