«Yuventus» ikki yangi futbolchini tarkibga qo‘shib olish uchun hujumchi Jonatan Devid bilan xayrlashishga tayyor.

«Keksa sinyora» erkin agent maqomidagi Frank Kessye bilan shartnoma imzolash ustida ishlashda davom etmoqda. Insayder Janluka Di Marsio ma’lumotiga ko‘ra, Turin klubi ivuarlik yarim himoyachining maoshini qoplash imkoniga ega bo‘lish uchun tarkibdagi futbolchilardan biri bilan xayrlashishi kerak.

Bu futbolchi Jonatan Devid bo‘lishi mumkin. «Yuventus» allaqachon kanadalik forvardni sotish ustida ish olib bormoqda. Devidning ketishi klubning maoshlar fondida taxminan 7 million yevro mablag‘ni bo‘shatib beradi.

Bu esa «Yuventus»ga nafaqat Kessyeni, balki «Manchester Yunayted» hujumchisi Joshua Zirkzeeni ham o‘z safiga qo‘shib olish imkonini berishi mumkin.

Jonatan Devid o‘tgan yilning yozida erkin agent sifatida «byankonerilar» safiga qo‘shilgan edi. Transfermarkt portali 26 yoshli futbolchining bozor qiymatini 30 million yevroga baholamoqda.