Самарқанднинг «Динамо» клуби ҳужумчиси Фирдавс Абдураҳмонов Ўзбекистон Суперлигаси 19-турининг энг яхши ёш футболчиси деб топилди.

21 ёшли футболчи 19-тур доирасида «Пахтакор»га қарши ўтказилган учрашувда «Динамо»нинг асосий таркибида майдонга тушди ва жамоасини мағлубиятдан қутқариб қолди. Тошкентликлар 62-дақиқада Ҳожимат Эркиновнинг голидан кейин ҳисобда олдинга чиққан бўлса, Абдураҳмонов 85-дақиқада Беҳрузбек Облақуловнинг узатмасидан сўнг жавоб тўпини киритди. Учрашув 1:1 ҳисобида якунланди.

Тур давомида Абдураҳмонов 4 марта зарба йўллади, унинг кутилган голлар кўрсаткичи 0,4 ни ташкил қилди. Шунингдек, футболчининг узатмалар аниқлиги 70 фоиз бўлди.

Фирдавс Абдураҳмонов кетма-кет иккинчи турда Суперлиганинг энг яхши ёш футболчиси деб топилди. «Динамо» ҳужумчиси 18-турда ОКМК дарвозасига ғалаба голини киритиб, ушбу номинацияни қўлга киритган эди. Энди у 19-тур якунларига кўра ҳам энг яхши ёш футболчи сифатида эътироф этилди.