Испания терма жамоаси бош мураббийи Луис де ла Фуэнте 2026 йилги Жаҳон чемпионати финалидан кейин Аргентина футболчилари иштирокида юз берган можарога яна бир бор муносабат билдирди. Мутахассис бундай хатти-ҳаракатларни қабул қилиб бўлмаслигини таъкидлади.

«Айрим футболчиларнинг хатти-ҳаракатлари намуна бўладиган даражада эмас эди. Бундай вазиятларга тоқат қилиб бўлмайди. Жаҳон чемпионати финалидан кейин бу каби ҳолатлар содир бўлишига йўл қўймаслик керак.

Икки миллиарддан ортиқ одам кузатаётган пайтда бундай манзарани кўрсатиб бўлмайди. Аммо энг муҳими — бизнинг футболчиларимиз жабрланувчи бўлди. Улар ўша тўқнашувларнинг келиб чиқишига алоқадор эмасди ва содир бўлган воқеалардан зарар кўрган томон бўлди», — деди Де ла Фуэнте.

Испания ва Аргентина ўртасидаги Жаҳон чемпионати финали 19 июль куни Нью-Йорк — Нью-Жерси стадионида ўтказилган. Испания қўшимча бўлимларда киритилган ягона гол эвазига 1:0 ҳисобида ғалаба қозониб, тарихида иккинчи марта жаҳон чемпиони бўлган.

Финалдан кейин футболчилар ва Аргентина мураббийлар штаби вакиллари иштирокида тўқнашув юз берди. ФИФА кейинчалик воқеа бўйича интизомий иш очиб, Леандро Паредесни 10 та, Науэль Молинани 7 та, Аргентина мураббийлар штаби аъзоси Роберто Аялани 3 та ўйинга четлатди. Тиаго Алмада ва Испания ярим ҳимоячиси Гави эса биттадан учрашувга дисквалификация қилинди.