Ispaniya terma jamoasi bosh murabbiyi Luis de la Fuente 2026 yilgi Jahon chempionati finalidan keyin Argentina futbolchilari ishtirokida yuz bergan mojaroga yana bir bor munosabat bildirdi. Mutaxassis bunday xatti-harakatlarni qabul qilib bo‘lmasligini ta’kidladi.
«Ayrim futbolchilarning xatti-harakatlari namuna bo‘ladigan darajada emas edi. Bunday vaziyatlarga toqat qilib bo‘lmaydi. Jahon chempionati finalidan keyin bu kabi holatlar sodir bo‘lishiga yo‘l qo‘ymaslik kerak.
Ikki milliarddan ortiq odam kuzatayotgan paytda bunday manzarani ko‘rsatib bo‘lmaydi. Ammo eng muhimi — bizning futbolchilarimiz jabrlanuvchi bo‘ldi. Ular o‘sha to‘qnashuvlarning kelib chiqishiga aloqador emasdi va sodir bo‘lgan voqealardan zarar ko‘rgan tomon bo‘ldi», — dedi De la Fuente.
Ispaniya va Argentina o‘rtasidagi Jahon chempionati finali 19 iyul kuni Nyu-York — Nyu-Jersi stadionida o‘tkazilgan. Ispaniya qo‘shimcha bo‘limlarda kiritilgan yagona gol evaziga 1:0 hisobida g‘alaba qozonib, tarixida ikkinchi marta jahon chempioni bo‘lgan.
Finaldan keyin futbolchilar va Argentina murabbiylar shtabi vakillari ishtirokida to‘qnashuv yuz berdi. FIFA keyinchalik voqea bo‘yicha intizomiy ish ochib, Leandro Paredesni 10 ta, Nauel Molinani 7 ta, Argentina murabbiylar shtabi a’zosi Roberto Ayalani 3 ta o‘yinga chetlatdi. Tiago Almada va Ispaniya yarim himoyachisi Gavi esa bittadan uchrashuvga diskvalifikasiya qilindi.
