Diario SPORT маълумотига кўра, "Барселона" спорт директори Деку Ла Масиянинг икки иқтидорли футболчиси — Хави Эспарт ва Бриан Фариньяснинг келажагини клуб билан боғлаш учун уларга асосий жамоага мос яхшиланган шартномалар таклиф қилишга тайёрланмоқда.
Клубнинг ёзги трансфер ойнасидаги асосий эътибори марказий ҳужумчи харид қилишга қаратилган бўлса-да, Деку бир вақтнинг ўзида академиядан етишиб чиқаётган иқтидорларни рағбатлантириш мақсадида бир нечта муҳим шартномаларни узайтириш ишларини ҳам олиб бормоқда.
Хави Эспарт мавсумолди тайёргарлигидаги ёрқин ўйинлари орқали Ханси Флик жамоасида доимий ўринга эга бўлди. У "Эльче"га қарши ярим ҳимояда, шунингдек, чап қанот ҳимоячиси сифатида яхши ҳаракат қилиб, тактик жиҳатдан универсал футболчи эканини кўрсатди.
Эспарт билан бирга 19 ёшли ярим ҳимоячи Бриан Фариньяс ҳам мураббийлар штабида яхши таассурот қолдирди. Шу боис у янги мавсумда ижарага кетмай, асосий жамоа билан қолиши кутилмоқда.
Трансфер ойнаси ёпилганидан кейин, сентябрь ойида музокаралар бошланиши режалаштирилган. "Барселона" ҳар икки ёш футболчини янгиланган шартлар асосида расман асосий жамоа аъзоси сифатида рўйхатдан ўтказишни режалаштирмоқда.
