Трансферлар бўйича мутахассис Маттео Моретто "Барселона"нинг янги марказий ҳимоячи излаётгани ҳақида қўшимча маълумот берди. У "РБ Лейпциг" футболчиси Кастелло Лукеба ва "Спортинг" ҳимоячиси Гонсалу Инасиу вариантларини истисно қилди.
"Лукеба ва Гонсалу Инасиунинг "Барселона"га марказий ҳимоячи сифатида ўтишини истисно қиламан. Клуб кўз остига олган футболчи уларга қараганда камроқ танилган", — деди Моретто.
Бу маълумот ёзги трансфер ойнасининг сўнгги кунларида "Барселона"нинг янги чапоёқ марказий ҳимоячи қидирувини янада қизиқарли тусга киритди.
Сўнгги хабарларга кўра, каталонияликлар "Твенте"нинг ёш марказий ҳимоячиси Рууд Нийстад бўйича маълумот сўраган. Бироқ Нидерландия клуби футболчини сотишни истамаётгани айтилмоқда.
Шу билан бирга, "Барселона" Альваро Кортесни "Антверпен"га қўйиб юбориш арафасида турибди.
