«Манчестер Сити» Мадриднинг «Атлетико» клуби ҳужумчиси Хулиан Альваресни қайтариш имкониятини кўриб чиқмоқда.
Transfer News Live нашри Marca'га таяниб хабар беришича, «шаҳарликлар» эҳтимолий келишув шартларини муҳокама қилиш учун «Атлетико» билан боғланган. Гап футболчини ижарага олиш ҳақида кетган, аммо томонлар ҳали расмий музокараларга киришмаган.
Мадрид клуби Альварес билан фақат 150 миллион евро миқдорида таклиф тушган тақдирдагина хайрлашишга тайёр. Аргентиналик футболчининг ўзи эса Англияга қайтишга унчалик қизиқиш билдирмаяпти.
Эслатиб ўтамиз, Хулиан Альварес 2024 йилда айнан «Манчестер Сити»дан «Атлетико»га 75 миллион евро эвазига ўтган эди.
Transfermarkt портали 26 ёшли ҳужумчининг ҳозирги бозор қийматини 120 миллион евро деб баҳоламоқда. Унга «Арсенал» ва «Барселона» ҳам қизиқиш билдирмоқда.
