Амстердамнинг «Аякс» клуби пайшанба куни Швейцариянинг «Сьон» жамоасини 5:3 ҳисобида мағлуб этди. Учрашувда гол урган Дэви Классен клуб тарихида ўзига хос натижа қайд этди.
Маълум бўлишича, Классен «Аякс» сафида Европа клуб мусобақаларида 20 та гол урган учинчи футболчига айланди.
Ундан олдин фақат икки нафар афсонавий футболчи — Йохан Кройф ва Яри Литманен бундай кўрсаткичга эришган. Ҳар иккиси ҳам «Аякс» сафида Европа турнирларида 26 тадан гол урган.
Эслатиб ўтамиз, Классен «Аякс» тарбияланувчиси ҳисобланади. У фаолияти давомида бир неча бор клубни тарк этган, сўнгги марта эса 2024 йилда Амстердам жамоасига қайтган.
