«Бавария» ярим ҳимоячиси Йозуа Киммих Бундеслиганинг 1-турида «Штутгарт» устидан қозонилган 5:1 ҳисобидаги ғалабадан кейин жамоа ўйинига баҳо берди.

Амалдаги чемпионлар янги мавсумни йирик ғалаба билан бошлади. «Штутгарт» 52-дақиқада ҳисобни тенглаштиришга муваффақ бўлган эди, аммо кейин мюнхенликлар устунликни ўз томонига оғдирди.

«Бу «Штутгарт»га қарши одатий ўйин бўлди — сўнгги 30 дақиқагача кескинлик сақланиб турди. Ҳар икки жамоа ҳам шахсий қўриқлаш асосида ўйнади, бу эса жуда қийин ва юқори интенсивликни талаб қилади.

Дастлабки 25 дақиқа биз учун унчалик яхши ўтмади, аммо кейин ўз ритмимизни топдик ва, менимча, муносиб ғалаба қозондик», — деди Киммих.

«Бавария» 2 сентябрь куни Германия кубоги доирасида «Оснабрюк»ка қарши майдонга тушади.