«Bavariya» yarim himoyachisi Yozua Kimmix Bundesliganing 1-turida «Shtutgart» ustidan qozonilgan 5:1 hisobidagi g‘alabadan keyin jamoa o‘yiniga baho berdi.

Amaldagi chempionlar yangi mavsumni yirik g‘alaba bilan boshladi. «Shtutgart» 52-daqiqada hisobni tenglashtirishga muvaffaq bo‘lgan edi, ammo keyin myunxenliklar ustunlikni o‘z tomoniga og‘dirdi.

«Bu «Shtutgart»ga qarshi odatiy o‘yin bo‘ldi — so‘nggi 30 daqiqagacha keskinlik saqlanib turdi. Har ikki jamoa ham shaxsiy qo‘riqlash asosida o‘ynadi, bu esa juda qiyin va yuqori intensivlikni talab qiladi.

Dastlabki 25 daqiqa biz uchun unchalik yaxshi o‘tmadi, ammo keyin o‘z ritmimizni topdik va, menimcha, munosib g‘alaba qozondik», — dedi Kimmix.

«Bavariya» 2 sentyabr kuni Germaniya kubogi doirasida «Osnabryuk»ka qarshi maydonga tushadi.