Бу дам олиш кунлари Европанинг топ-чемпионатлари орасида энг сўнггиси — Германия Бундеслигасида ҳам янги мавсум старт олди.
«Кёльн» ўз майдонида «Хоффенхайм»ни қабул қилди. Мезбонлар учрашув давомида икки марта ҳисобда ортда қолишига қарамай, якунда 3:2 ҳисобида иродали ғалабани қўлга киритди.
«Кёльн»нинг янги футболчиси Тейс Даллинга ушбу муваффақиятнинг бош қаҳрамонига айланди. Иккинчи бўлим ўрталарида захирадан майдонга тушган ҳужумчи иккита гол урди.
Даллинга 72-дақиқада ҳисобни тенглаштирди, орадан ўн дақиқа ўтиб эса яна рақиб дарвозасини ишғол қилиб, жамоасига ғалаба келтирган гол муаллифи бўлди.
Шу тариқа, Даллинга «Кёльн» тарихида Бундеслигадаги дебют ўйинида дубль қайд этган илк футболчига айланди.
Эътиборлиси, у бу натижага захирадан майдонга тушиб эришди ва ўйинда ярим соатдан ҳам кам вақт ҳаракат қилди.
