Bu dam olish kunlari Yevropaning top-chempionatlari orasida eng so‘nggisi — Germaniya Bundesligasida ham yangi mavsum start oldi.
«Kyoln» o‘z maydonida «Xoffenxaym»ni qabul qildi. Mezbonlar uchrashuv davomida ikki marta hisobda ortda qolishiga qaramay, yakunda 3:2 hisobida irodali g‘alabani qo‘lga kiritdi.
«Kyoln»ning yangi futbolchisi Teys Dallinga ushbu muvaffaqiyatning bosh qahramoniga aylandi. Ikkinchi bo‘lim o‘rtalarida zaxiradan maydonga tushgan hujumchi ikkita gol urdi.
Dallinga 72-daqiqada hisobni tenglashtirdi, oradan o‘n daqiqa o‘tib esa yana raqib darvozasini ishg‘ol qilib, jamoasiga g‘alaba keltirgan gol muallifi bo‘ldi.
Shu tariqa, Dallinga «Kyoln» tarixida Bundesligadagi debyut o‘yinida dubl qayd etgan ilk futbolchiga aylandi.
E’tiborlisi, u bu natijaga zaxiradan maydonga tushib erishdi va o‘yinda yarim soatdan ham kam vaqt harakat qildi.
