«Барселона» шу ҳафта Доминик Ливакович билан шартнома имзолаганини эълон қилди. Бироқ каталонияликлар ҳалигача 31 ёшли хорватиялик дарвозабонни рўйхатдан ўтказа олмаган. Бу ҳақда Marca хабар берди.

Дастлаб «Барселона» спорт раҳбарияти дарвозабонлар чизиғини кучайтиришни режалаштирмаган эди. Жамоа спорт директори Деку Ливаковични олдиндан шартнома билан таъминлаб, Войцех Шчеснининг 2027/28 йилги мавсумдан бошлаб, шартномаси якунлангач, ўрнига келтиришни режалаштирган. Бироқ кейин клуб Ливаковичдан жорий мавсумнинг ўзида фойдаланиш мумкин, деган қарорга келди.

Трансфер расман эълон қилинганига қарамай, «Барселона» молиявий «фэйр-плей» талаблари билан боғлиқ чекловлар сабаб Ливаковични ҳозирча заявкага кирита олмаяпти. Клуб сўнгги имкониятгача кутишни режалаштирмоқда ва маош лимитида зарур жойни топишга умид қилмоқда.

Агар Ливаковични рўйхатдан ўтказишнинг иложи бўлмаса, дарвозабон ижарага берилади ва 2027/28 йилги мавсум бошида каталонияликлар сафига қўшилади.