«Barselona» shu hafta Dominik Livakovich bilan shartnoma imzolaganini e’lon qildi. Biroq kataloniyaliklar haligacha 31 yoshli xorvatiyalik darvozabonni ro‘yxatdan o‘tkaza olmagan. Bu haqda Marca xabar berdi.

Dastlab «Barselona» sport rahbariyati darvozabonlar chizig‘ini kuchaytirishni rejalashtirmagan edi. Jamoa sport direktori Deku Livakovichni oldindan shartnoma bilan ta’minlab, Voysex Shchesnining 2027/28 yilgi mavsumdan boshlab, shartnomasi yakunlangach, o‘rniga keltirishni rejalashtirgan. Biroq keyin klub Livakovichdan joriy mavsumning o‘zida foydalanish mumkin, degan qarorga keldi.

Transfer rasman e’lon qilinganiga qaramay, «Barselona» moliyaviy «feyr-pley» talablari bilan bog‘liq cheklovlar sabab Livakovichni hozircha zayavkaga kirita olmayapti. Klub so‘nggi imkoniyatgacha kutishni rejalashtirmoqda va maosh limitida zarur joyni topishga umid qilmoqda.

Agar Livakovichni ro‘yxatdan o‘tkazishning iloji bo‘lmasa, darvozabon ijaraga beriladi va 2027/28 yilgi mavsum boshida kataloniyaliklar safiga qo‘shiladi.