Италия терма жамоаси ҳужумчиси Мойзе Кин «Фиорентина»дан «Комо»га ўтиш арафасида. Томонлар футболчининг трансфери бўйича келишувга эришишга яқин қолган.

«Комо» Кинни қўлга киритиш учун музокараларни фаол давом эттириб, «Фиорентина»нинг талабларига тобора яқинлашди.

Ломбардия клуби аввалги таклифини яхшилаб, умумий қиймати 40 миллион евро атрофида бўлган шартларни таклиф қилди. Унинг 35 миллион евроси кафолатланган тўлов, яна 5 миллион евро эса бонуслардан иборат.

Киннинг ўзи ҳам «Комо»га ўтиш истагини очиқ билдирган. Ушбу трансфер италиялик ҳужумчига Чемпионлар лигасида иштирок этиш имконини беради. «Комо» тарихида илк бор Европа клубларининг энг нуфузли мусобақасида қатнашади ва клуб раҳбарияти таркибни кучайтиришни мақсад қилган.

Киннинг «Фиорентина»даги келажаги эса сўнгги кунларда жиддий савол остида қолган эди. Ҳужумчи жамоа машғулотига кечикиб келган ва шу сабабли клуб томонидан жаримага тортилган. Кейинчалик у якка тартибдаги машғулотда иштирок этган.