Италия чемпионатининг 4-туридан ўрин олган «Милан» — «Лацио» учрашуви бошқа санага кўчирилди.
Pianetamilan.it маълумотига кўра, дастлаб 13 сентябрь, якшанба куни ўтказилиши режалаштирилган баҳс бир кун олдин — 12 сентябрь, шанба кунига белгиланди.
Шунингдек, учрашувнинг бошланиш вақти ҳам ўзгарди. Аввалига баҳс Тошкент вақти билан соат 23:45 да бошланиши режалаштирилган бўлса, энди жамоалар соат 21:00 да майдонга тушади.
Ўйиннинг кўчирилиши еврокубок мусобақалари бошланиши билан боғлиқ.
«Милан» бу мавсум Чемпионлар лигасида эмас, Европа лигасида иштирок этади. Италия клуби 16 сентябрь куни ушбу мусобақа доирасида Португалиянинг «Бенфика» жамоасига қарши баҳс олиб боради.
Шу сабабли «россонерилар»га еврокубок учрашувига тайёргарлик кўриш учун кўпроқ вақт бериш мақсадида «Лацио»га қарши чемпионат баҳси бир кун олдинга сурилди.
