Польша Миллий олимпия қўмитаси раҳбари Радослав Песевичнинг ҳибсга олиниши сабаб мамлакат терма жамоаси Олимпия ўйинларида иштирок этиш ҳуқуқидан маҳрум бўлиши мумкин.
Бу ҳақда Onet портали Польша Миллий олимпия қўмитаси аъзоларига юборилган ички мактубга таяниб хабар берди. Ўтган ҳафта Песевич банкрот бўлган Zondacrypto криптовалюта биржаси билан боғлиқ иш доирасида ҳибсга олинган эди. Амалдор коррупцияда айбланмоқда.
Манба маълумотига кўра, Халқаро олимпия қўмитаси вазиятни ҳал қилиш учун учта вариантни таклиф қилган.
Биринчи вариант — Песевичнинг ўз хоҳиши билан истеъфога чиқиши. Бироқ у ўзига қўйилган айбловларни рад этаётгани сабаб бундай қадам ташлаши эҳтимоли паст экани қайд этилмоқда.
Иккинчи вариантга кўра, ташкилот обрўсига етказилиши мумкин бўлган зарарни ҳисобга олган ҳолда, Миллий олимпия қўмитаси кенгаши Песевичнинг ваколатларини вақтинча тўхтатиш тўғрисида қарор қабул қилиши мумкин.
Учинчи ва энг кескин сценарий — Халқаро олимпия қўмитасининг вазиятга бевосита аралашиши. Бу Польша Миллий олимпия қўмитаси фаолиятининг вақтинча тўхтатилишига олиб келиши мумкин. Бундай ҳолатда Польша терма жамоаси Олимпия ўйинларида иштирок эта олмайди.
Навбатдаги ёзги Олимпия ўйинлари 2028 йилда Лос-Анжелес шаҳрида бўлиб ўтади.
