Фаолияти давомида Ўзбекистон Суперлигасининг “Навбаҳор”, “Сурхон”, “ОКМК” ва “Бухоро” жамоалари шарафини ҳимоя қилган украиналик футболчи Олександр Касян 38 ёшида вафот этди. Бу ҳақда футболчининг собиқ клуби — Россиянинг “Факел” жамоаси матбуот хизмати хабар берди. Клуб маълумотига кўра, Касяннинг юраги тўхтаб қолган.

Касян фаолиятининг катта қисмини Россияда ўтказган. У 2013–2018-йиллар давомида “Факел”, “Том”, “Химик”, “Балтика” ва “Авангард” клублари сафида ўйнаган. Футболчи 2019-йилда Наманганнинг “Навбаҳор” клубига қўшилган. Кейинчалик фаолиятини “Сурхон”, ОКМК ва “Бухоро” жамоаларида давом эттирган. Касяннинг фаолиятидаги сўнгги клуби “Бухоро” бўлган. У 2023-йилда айнан шу жамоа сафида футболчилик фаолиятини якунлаган.

Умуман олганда, футболчи Ўзбекистон Суперлигасида жами 102 та учрашувда иштирок этиб, 24 та гол ва 9 та голли узатма муаллифига айланган. Шунингдек, ҳужумчи Украина ёшлар терма жамоасида икки учрашувда майдонга тушиб, бир гол урган.