Испаниялик ҳужумчи Марк Гиу Лондоннинг «Челси» клубидан «РБ Лейпциг»га ўтди. Бу ҳақда Германия клуби матбуот хизмати хабар берди.

20 ёшли Гиу «РБ Лейпциг» билан 2031 йилгача мўлжалланган шартнома имзолади. Янги клубида ҳужумчи 9-рақамда тўп суради.

«„РБ Лейпциг“га ўтиш мен учун тўғри қадам. Бу клубда ёш футболчилар ривожланади. Шу билан бирга, „РБ Лейпциг“ олдига энг юқори мақсадларни қўядиган амбицияли клуб», — деди Гиу клуб матбуот хизматига.

Маълумотларга кўра, немис клуби Гиу трансфери учун 17 миллион евро тўлаган.

Испаниялик футболчи 2024 йилдан буён «Челси»да ўйнаб келаётган эди. Шу вақт давомида у барча турнирларда 29 та учрашувда иштирок этиб, 8 та гол урди ва 2 та голли узатма амалга оширди.