«Ливерпуль» «Селтик»нинг 16 ёшли марказий ҳимоячиси Дара Жикиеми трансферини расман якунлади. Ёш футболчи Премьер-лиганинг беш босқичли жараёнидан ўтганидан сўнг, «Энфилд»га кўчиб ўтганини Instagram орқали тасдиқлади.
Жикиеми Саймон Уайлз бошчилигидаги «Ливерпуль» U18 жамоасига стипендия шартномаси асосида қўшилади. Шу билан бирга, у 17 ёшга тўлганидан кейин, яъни январь ойида имзолаши мумкин бўлган профессионал шартнома бўйича ҳам аввалдан келишувга эришган.
«Ливерпуль» бу трансферни дастлаб январь ойида амалга оширишга уринган, аммо клублар трансфер пули борасида келишолмаган. Кейинчалик Жикиеми «Селтик»нинг стипендия таклифини рад этган ва Шотландия клуби якунда футболчини тайёрлагани учун компенсация олган.
Жикиеми сўнгги саккиз ой ичида «Ливерпуль» академиясига қўшилган тўртинчи ёш марказий ҳимоячи бўлди. Ундан олдин клуб Мор Талла Ндиайе, Ноа Адекоя ва Ифеаньи Ндуквени ҳам ўз сафига жалб қилган эди.
Айни пайтда Ндиайе ва Адекоя U21 жамоасида жароҳат олгани сабаб, Жикиеми қисқа вақт ичида юқори ёш тоифасидаги жамоага кўтарилиши мумкин.
Шотландия U16 терма жамоаси сардори ҳисобланган Жикиеми ҳимоядан тўп билан чиқишни яхши биладиган, фаол ва замонавий услубда ўйнайдиган марказий ҳимоячи сифатида юқори баҳоланмоқда. У «Селтик» U18 жамоасида мунтазам асосий таркибда майдонга тушган.
