Учта ўйиндан кейин атиги икки очко — Лондоннинг «Вест Хэм» клуби Чемпионшипда ҳам қийин аҳволдан чиқа олмаяпти.
Мавсум бошланишидан олдин клуб раҳбарияти Премьер-лигага имкон қадар тезроқ қайтиш ниятини яширмаган эди. Opta портали ҳам «болғачилар»ни Англиянинг куч жиҳатидан иккинчи дивизионидаги асосий фаворит сифатида кўрсатганди.
Бироқ «Вест Хэм» «Уотфорд» билан дуранг ўйнаганидан кейин мухлисларнинг сабри тугади. Улар жамоа бош мураббийи Нуну Эшпириту Сантуни ҳуштакбозлик билан қарши олди.
«Чарльтон»га қарши 1:2 ҳисобидаги мағлубият эса янада оғриқли бўлди. «Вест Хэм» футболчилари ушбу баҳсда ҳеч бўлмаганда дурангга эришиш имкониятига эга эди, аммо пенальтидан фойдалана олмади.
