«Халл Сити» «Женоа» ҳимоячиси Брук Нортон-Каффи билан шартнома имзолаганини эълон қилди. 22 ёшли англиялик футболчи клубнинг ёзги трансфер ойнасидаги 15-янги футболчисига айланди.

Томонлар ўртасидаги шартнома беш йилга мўлжалланган. Трансфер суммаси ошкор этилмаган.

Битим доирасида «Халл Сити» ҳимоячиси Коди Драме эса «Женоа» сафига ўтди.

Нортон-Каффи сўнгги икки мавсумни «Женоа»да ўтказиб, Италия чемпионатида 40 та ўйинда майдонга тушган. Англиялик футболчи Сергей Якирович жамоасининг ўнг қанот ҳимоясини кучайтириши кутилмоқда.

Нортон-Каффи «Арсенал» тарбияланувчиси ҳисобланади, аммо у клубнинг асосий жамоасида ўйнамаган. «Женоа»га ўтишидан олдин ҳимоячи «Линкольн Сити», «Ротерхэм Юнайтед», «Ковентри Сити» ва «Миллуолл» клубларида ижара асосида тўп сурган.