Нигериялик ярим ҳимоячи Феми Азиз Англиянинг «Брайтон энд Хоув Альбион» клуби футболчисига айланди. Бу ҳақда клубнинг расмий сайти хабар берди.

«Брайтон» «Миллуолл»дан нигериялик вингер Феми Азиз билан 4 йиллик шартнома имзолаганини тасдиқлади. Битим шартлари ошкор этилмаган.

Икки клуб келишувни кеча соат 23:00 гача тақдим этган ва муддат бугун соат 01:00 гача узайтирилган. Томонлар трансферни узайтирилган муддат тугашидан олдин расмийлаштиришга улгурган.

25 ёшли Феми Азиз Нигерия терма жамоасидаги дебютини жорий йил июнь ойида ўтказди. У Зимбабвега қарши ғалаба билан якунланган учрашувда (2:0) жамоасининг ҳар икки голига муаллифлик қилди. Кейинги Ямайкага қарши ўйинда (3:0) эса голли узатма амалга оширди.