Габриэл Жезус "Арсенал"дан "Барселона"га ўтганидан сўнг кеча каталонияликларнинг янги футболчиси сифатида расман таништирилди.

Diario Sport маълумотига кўра, "Барселона" трансфер ойнасининг сўнгги кунларида келишувни якунлаган. Каталония клуби бразилиялик ҳужумчи учун "Арсенал"га 10 миллион евро тўлайди, яна 4 миллион евро турли бонуслар кўринишида қўшилиши мумкин.

"Барселона" молиявий фэйр-плей талабларини ҳисобга олган ҳолда трансферни эҳтиёткорлик билан амалга оширган.

29 ёшли Жезус ҳам клубга ўтишни осонлаштириш учун маошини сезиларли даражада камайтиришга рози бўлган. Бу қарор футболчини асосий жамоа таркибида рўйхатдан ўтказиш жараёнига ҳам ёрдам берган.

Жезус "Арсенал"да йилига тахминан 16 миллион евро маош олган бўлса, "Барселона"да унинг йиллик маоши (солиқлар билан бирга) 13 миллион евро атрофида бўлади.

Шу тариқа, бразилиялик ҳужумчи Каталония клубига ўтиш учун молиявий жиҳатдан ҳам ён беришга тайёр бўлган.