"Арсенал" спорт директори Андреа Бертанинг трансфер музокараларини олиб бориш услуби рақиб клублар томонидан танқид қилинмоқда. Бу ҳақда The Athletic хабар берди.
Айрим клублар "Арсенал" сотувчи томон билан тўғридан-тўғри мулоқот қилиш ўрнига воситачилардан кенг фойдаланишидан норози бўлган.
Бу ёндашув Жереми Монга ва Бруну Гимарайнс трансферлари вақтида ҳам саволлар туғдирган. Лондонликлар Монгани ўз сафига қўша олмаган, Гимарайнс учун эса дастлаб режалаштирилганидан кўпроқ маблағ тўлашга мажбур бўлган.
"Арсенал" ёзда юқори даражадаги ҳужумчи билан шартнома имзолай олмагани ҳам клубнинг трансфер режалаштиришига нисбатан саволларни кучайтирди. Жамоа турли пайтларда услуби ва профили бир-биридан кескин фарқ қиладиган Морган Рожерс, Винисиус Жуниор ва Хулиан Альварес каби футболчиларни кўриб чиққан.
Айрим манбаларга кўра, "Арсенал"нинг ўтган мавсумда чемпионлик учун курашга ҳаддан ташқари катта эътибор қаратиши ёзги трансферлар режасини етарлича пухта тайёрламаслигига сабаб бўлган.
Бертанинг ўзи эса клубдаги бюрократик жараёнлар кўпайганидан норози. Бу трансфер қарорларини секинлаштираётгани ва унинг музокаралардаги ваколатини чеклаётгани айтилмоқда.
Натижада "Арсенал" ҳужум чизиғига элита даражасидаги янги футболчи қўшмасдан қолди. Ҳозирда Христос Цолис жамоанинг чап қанотдаги биринчи танлови бўлиб кўринмоқда.
