Аргентина футбол ассоциацияси (AFA) мамлакат чемпионатининг барча дивизионларидаги навбатдаги тур ўйинлари миллий жамоадаги фаолиятини якунлаган Лионель Месси шарафига 10-дақиқада вақтинча тўхтатилишини маълум қилди.
«Эркаклар ва аёллар ўртасидаги барча йўналишларда — футбол, футзал ва соҳил футболида — навбатдаги учрашувларнинг биринчи бўлими 10-дақиқага етганида ўйин тўхтатилади. Аргентина миллий жамоаси сафидаги фаолияти учун Лионель Мессига миннатдорлик рамзи сифатида бир дақиқалик олқишлар ташкил этилади.
Экранлар ўрнатилган стадионларда эса учрашувлар бошланишидан олдин расмий видеоролик намойиш этилиши шарт», — дейилади AFA баёнотида.
Аввалроқ Лионель Месси Аргентина миллий жамоасидаги фаолиятини якунлаганини эълон қилган эди.
Месси терма жамоа сафида 2022 йилги жаҳон чемпионати ғолиби бўлди. Шунингдек, у икки бор Америка кубогини қўлга киритди — 2021 ва 2024 йилларда. Бундан ташқари, 2022 йилги Финалиссима ҳамда 2008 йилги Олимпия ўйинларида ҳам чемпионликка эришган.
